LAOAG CITY – Maisayangkat iti masungad a Septiembre 23 ken 24 ti Bagong Pilipinas Serbisyo Fair nga arigna ket “national version” ti capitol express.
Segun ken ni Mr. Ryan R. Remigio, Chief of Staff ni Cong. Ferdinand Alexander “Sandro” Marcos III, ditoy a makipaset dagiti amin nga ahensia ti gobierno.
Inbatadna a kangrunaan a gagem daytoy a maidanon ti administrasyon ni Pres. Ferdinand Bongbong Marcos Jr. dagiti nagdumaduma a serbisio kadagiti umili tapno maipamatmat nga adda ti gobierno a tumultulong.
Inpaayna nga ehemplo ti Philippine Statistics Authority a mabalin dagiti kakailian nga agprobproblema iti spelling dagiti naganda a pakorehir.
Kabayatanna, inlawlawagna nga iti medical services ket naipakaammon iti immun-una a gundaway ni Department of Health Regional Director Paula Paz Sydiongco nga adda dagiti maisayangkat a minor injury operations.
Kunana a malaksid iti pannakausar ti Mariano Marcos State University College of Teacher Education ket adda pay dagiti mausar a mobile clinic.
Inbunannagna a dagiti ipaayan ti Land Transportation Office ti student permit ket nalpasen a dimmalan iti seminar.
Inlawlawagna nga agpapada a maserbian dagiti taga umuna ken maikadua a distrito ti probinsia agsipud ta ti serbisyo fair ket manipud iti opisina ti presidente iti kooperasyon ti Office of the House Speaker a ni Hon. Martin Romuladez, Presidential Communications Operations Office pakairamanan ti opisinada Cong. Sandro Marcos ken ni Cong. Angelo Marcos Barba ken ni Gob. Matthew Marcos Manotoc.
Kunana nga agsipud ta maysa ti Ilocos Norte kadagiti umuna a pakaisayangkatan ti nasao a programa ket adda dagiti cabinet secretaries a manamnama a sumangpet nga umay agobserbar tapno mapasayaat apaman a mapanda iti sabali a lugar.
Innayonna nga aggigiddan a maisayangkat daytoy a programa ti presidente iti Ilocos Norte, maysa a lugar idiay Bicol ken dua idiay Mindanao.
