LAOAG CITY – Inlawlawag ni Dra. Czarina Alcaraz, ti head iti OB Department iti Mariano Marcos Memorial Hospital and Medical Center iti ciudad ti Batac dagiti wagas para iti panag-family planning.
Karaman ditoy ket ti panagusar iti birth control pills, implant, injectible, ken ti panagusar ti condom para kadagiti lallaki.
Segun ken ni Dra. Alcaraz, ti panaginom ti pills ket masapol a regular tapno maliklikan ti panagsikog.
Inbatad na a ti implant ket mabalin nga ikkaten iti aniaman nga oras no madi ti epekto na iti maseknan ken kalikagomen ti agsikog ti maysa a babai.
Kuna na no ti usaren dagiti agasawa ket condom ket masapol a siguradwen nga awan ti buttaw na, saan nga expired ken usto ti panangusar tapno saan a masikugan ti asawa wenno partner. Innayon ni Dra. Alcaraz a ti panagusar ti pills, implant ken injectible ket saan a maliklikan ti makarikna iti aniaman nga epekto na kas iti panagsakit iti ulo, panagulaw, agbaliw ti panagregla na no sadinno a no nabayagen nga umin-inom ti pills ket mabalin a saanen a kas iti dati ti kaado ti regla ti babai.
