LAOAG CITY – Ibinsa-binsa ni Mr. Danilo Ramos, national chairperson ti Kilusang Mangbubukid ng Pilipinas dagiti posible a makatulong iti panagbalin a 20 a pisos iti kada kilo ti bagas.
Kuna ni Ramos nga iti baet ti agtultuloy a panagngato dagiti amin a magatgatang partikular kadagiti mausar ti panagtalon kas iti langis ken abono,masapol nga adda ti addang nga aramiden ti gobierno.
Inbatad na a masapol a mapatgan ti suspension ti excise tax iti langis, maipababa ti presyo ti abono ken maipaayaan ti dakdakkel a pondo iti benneg ti agrikultura kangrunaan iti kasapulan dagiti mannalon.
Kuna na a karaman ditoy ti pannakaibasura ti rice liberalization law wenno ti rice tarrification law (RA11203).
Inlawlawag na a babaen iti pannakaibasura ti nasao a linteg ket saanen a mapawilan ni National Food Authority a gumatang iti irik kadagiti mannalon.
Inbunannag na a nu agsubli ti panaggatang ti NFA kadagiti milled rice ket mabalin a makapaglako ti baga iti nababa a presyo.
