LAOAG CITY – Indauloan ni Presidente Ferdinand Marcos Jr. dagiti nagduduma nga aktibidad ti gobierno para iti pannakaselebrar ti maika-127 a tawen nga anibersario ti Independence Day ita nga aldaw.
Alas-7:00 itay bigat ket indauloan ti Presidente ti pannakaipangato ti bandera ti Pilipinas ken wreath-laying ceremony iti monumento ni Gat. Jose Rizal iti Rizal Park wenno Luneta idiay Manila.
Naggigiddan daytoy nga insayangkat iti intero a pagilian kadagiti ahensia ken pasdek ti gobierno pakairamanan dagiti amin nga embahada ti Pilipinas.
Naisayangkat ti Parada ng Kalayaan iti Quirino Grandstand, Rizal Park ken iti sango ti Cultural Center of the Philippines (CCP) itay 7:30 ti bigat.
Kabayatanna, iti alas-5:00 ita a malem ket indauloan ti Presidente ti tradisional a Vin D’Honneur o Wine of Honors iti Malacañang nga inatendar dagiti sumagmamano nga opisial ti gobierno ken dadduma pay a personalidad.
