LAOAG CITY – Manamnama ti pannakaiwayat ti nagduduma nga aktibidad kas paset ti selebrasyon iti 2024 nutrition month ita a bulan ti Hulyo.
Daytoy ket organisaren ti Provincial Nutrition Action Office iti kapitolyo probinsyal.
Segun kenni Miss Elma Irapta, ti mangidadaulo iti Provincial Nutrition Action Office, itultuloy da dagiti aktibidad ken programa a mangtagiben iti salun-at ti umili.
Inpakaammo na nga adda ti iyuswat da a community outreach program ken ti pasalip a biggest loser.
Inlawalwag na a ti outreach program ket buklen dagiti member agencies iti Provincial Nutrition Committee ken dadduma nga stakeholders nga agkalikagum a mangisuro ti solusyon iti problema ti salun-at kadagiti komunidad.
Kabayatanna, inbatad ni Irapta a ti biggest loser ket mangutigut iti umili a mangpatalinaed ti healthy lifestyle tapno magun-od ti usto a timbang ken maliklikan ti chronic diseases, pakairamanan ti type 2 diabetes, heart disease, stroke ken dadduma pay a klase t cancer
Inpasigurado ni Irapta nga itultuloy da ti supplementary feeding program kadagiti pre schoolers ken dagiti masikog tapno mapagtalinaed a nababa ti kaso ti stunted children ditoy probinsiya.
Mainaig iti daytoy, inpakaammo ni Irapta nga iti biang ti Federation of Barangay Nutrition Scholars ditoy probinsya ket itultuloy da ti mangisayangkat iti Provincial Barangay Nutrition Scholar Congress tapno masigurado nga awan ti panagsardeng iti panageskwela dagiti scholars.
