LAOAG CITY – Mangiyuswat ti City Agriculture Office ditoy ciudad ti Laoag iti Agriculture and fishery sector celebration ita a tawen.
Daytoy ti inpakaammo ni Engr. Shiela Opelac, ti mangidadaulo iti City Agriculture office ditoy ciudad.
Kunana a ti nasao a selebrasyon ket agpaot ti tallo nga aldaw no sadinno mangrugi ita a bigat Mayo 19 agingga intono Mayo 21.
Inbatad na a nagduduma nga aktibidad ti insaganada para kadagiti mannalon ken mangngalap ditoy ciudad kas iti kompetisyon iti panagaramid ti kuribot ken panaguyama wenno panagdait kadagiti perdi a net.
Innayon na nga adda pay dagiti maayaban a nagduduma a kompania a mangitampok kadagiti produkto da para kadagiti mannalon ken mangngalap a mabalin da nga adaptaren.
Kabayatanna, kuna ni Engr. Opelac a ti nasao programa ket panagyaman ken maikkan ti pammigbig dagiti mannalon ken mangngalap ditoy ciudad ti Laoag.
