LAOAG CITY – Nagtitipon dagiti agad-adal manipud elementaria ken sekondaria ditoy ciudad ti Laoag para ti selebrasion ti National Students’ Day iti dakkel a mall ditoy ciudad.
Inbatad ni Mr. Christophe Agustin, ti Sang Kabataang Federated President ditoy ciudad ti Laoag a nakailanad ti Republic Act 11369 a tunggal Nobyembre 17 ket adda ti maisayangkat a kastoy nga aktibidad, maysa a wagas a mangrekognisar kadagiti agad-adal iti pagilian.
Kunana nga indauluan ti Sangguniang Kabataan Federation ditoy ciudad ti Laoag babaen iti pannakikammayet da iti City Schools Division, gobierno lokal ditoy ciudad babaen ti Local Youth Development Office ken SM City Laoag ti pannakaiwayat ti Laoag City Students’ Day Convention and Youth Fair 2025.
Segun pay kenkuana, kabayatan ti nasao nga aktibidad ket nakita ken nai-display dagiti partuat dagiti agad-adal a pakakitaan ti laing ken abilidad da.
Malaksid iti daytoy, adda pay ti naiwayat a short film competition ken adda dagiti naimbitaran nga speakers.
Innayon na a ditoy a nakita dagiti naidumduma a kinasirib, ideya ken inobasyon dagiti agad-adal, kangrunaan na iti benneg ti teknolohiya.
Patien na a kasapulan ti naan-anay a pannarabay ken suporta kadakuada tapno ad-adda pay a maipakita da ti kinalaing ken talento da a para ti masakbayan da ken kasta met a katulungan dagiti agtutubo para iti panagdur-as ti siudad.
