LAOAG CITY – Nakasaganan dagiti nagduduma nga aktibidad para iti maika-207 a founding anniversary ti Ilocos Norte.
Maiyuswat ti umuna a programa manipud inton Pebrero 1 agingga 9 ket ti Tan-ok ni Ilocano Film Festival iti maysa a dakkel a mall iti ili ti San Nicolas.
Naammoan a maisayangkat ti Narimat nga Aglawlaw Simultaneous Provincewide Clean Up Drive ken Tree Planting inton Pebrero 2 iti Saud Beach iti ili ti Pagudpud a pakipasetan dagiti nagduduma nga ili ken siudad ditoy probinsia.
Mainaig iti daytoy, maangay ti naindaklan a dance competition a Tan-ok Festival of Festivals inton Pebrero 15 iti Ferdinand Edralin Marcos Stadium.
Kabayatanna, malaksid iti daytoy ket adu pay dagiti aktibidad a mabalin a pakipartisiparan ti naruay nga umili iti panangrambak ti founding anniversary ditoy probinsia.
