LAOAG CITY – Manarimaan ti panagfiesta ti Metro Gabu kas paset ti panagyaman ti Fiesta San Rafael a nangrugi paylaeng idi Disyembre 26 agpatingga ita nga aldaw Disyembre 29, 2025.
Daytoy ti inbatad ni Barangay Chairman Jovito Sablay iti Gabu Norte ditoy ciudad ti Laoag.
Inpakaammo ni Sablay a karaman kadagiti naisayangkat nga aktibidad ita nga aldaw ket ti lumba dagiti Bangka wenno ti maaw-awagan ti “Bangkaton”, basketball tournament, ken intono rabii ket maangay ti coronation night.
Kuna ni Sablay a napapaot ti selebrasyon da iti Fiesta San Rafael ita a tawen no ikompara kadagiti naglabas a tawen a maysa laeng nga aldaw.
Innayon na a tinawen nga isayangkat da ti selebrasyon kas panagyaman iti Fiesta San Rafael aglalo ket ti kangrunaan a pamastrekan dagiti residente iti Metro Gabu ket ti panagkalap.
