LAOAG CITY – Inlawlawag ni Dr. Alan Taylan ti risgo ti panagdigos iti saan a nadalos a danom kangrunaan na ket panawen ti kalgaw ken ado dagiti mapan agdidigos.
Karaman kadagiti mabalin a sagabaen dagiti tattao ket ti skin infections kas iti allergy, rashes, karindanom ken ti pantal iti bagbagi, kasta pay ti conjunctivitis kas iti panaglabbaga ti mata gapo ta saan a maliklikan a marugitan ti mata bayat ti panagdigos iti saan a nadalos a danom iti karayan.
Malaksid iti daytoy, mabalin pay ti impeksyon iti karabukob kas iti panagpasar ti tonsillitis gapo ta mabalin a makatilmon latta ti danom, ken ti hearing infection.
Segun kenni Taylan, mabalin a pasaren dagiti tattao daytoy no agdigos iti saan a nadalos a karayan gapo iti rugit ti tao ken pagpadigusan kadagiti dingwen.
Mainaig iti daytoy, kuna ni Taylan a no adda dagiti marikna kalpasan ti panagdigos iti saan a nadalos a danom ket masapol nga agpakonsultar tapno saan a kumaro ken saan a mabaybay-an.
Inpetteng na a kasapulan ti disiplina iti bagi, masapol nga ammo ti panagtagibaen iti aglawlaw kas iti saan a panagibelleng ti supot ken dadduma pay a mabalin nga isu ti mangkontaminar iti kadandanoman.
Ummuna iti daytoy, adda ti ballaag ti Dept. of Health iti publiko kadagiti mabalin a maala a sakit no saan a nadalos ti pagdidigosan.
