LAOAG CITY – Inpasingked ni Fr. Joey Ranjo, pannakangiwat ti diocese of Laoag a naipatungpal ti nagduduma nga oras ti pannakaiyuswat ti simbang gabi wenno “misa de gallo.”
Kuna na a suruten dagiti dadduma a simbaan ditoy probinsya ti oras ti alas singko ti bigat a pannangrugi ti misa idinto a ti dadduma ket 4:30 kangrunaan na iti St. William Cathedral ditoy siudad.
Inbatad ni Ranjo a dagiti pay dadduma a simbaan ket mangiyuswat ti misa iti alas sais ti rabii tapno malimitaran dagiti agatendar ti bigat.
Inbaga na a daytoy a wagas ket kas panangsurot ti inyetnag ti IATF a guidelines nu sadino a 30% capacity laeng ti mabalin nga akomodaren ti simbaan.
Mainaig iti daytoy, inbunannag ni Ranjo a malimitaran ti oras ti misa nga umabot iti 30 agingga iti 45 a minutos laeng.
Innayun na a kalpasan ti misa ket dagus a dumalan iti disinfection ti simbaan.
Kabayatanna, inpagunam-gunam ni Ranjo a saan a kayat a sawen a nu saan a nakaatendar ti misa iti mismo a simbaan ken babaen laeng iti online ket saanen a makaawat ti bendisyon.
Ipagunam-gunam na a ti nasken ket manggeg dagiti nasantoan nga ebanghelio ti namarsua.
Innayun na a ti kangrunaan a paksaritaan ti “misa de gallo” ket ti panagyaman, panagdawat ti bendisyon ken pammakawan iti apo Diyos.
