LAOAG CITY – Bimmassit ti naggatang kadagiti tagilako a prutas iti bisperas ti kaaldawan ti paskua ditoy ciudad ti Laoag.
Kinumpirmaran daytoy ni Mrs. Joan Andres, aglaklako kadagiti prutas ditoy ciudad ti Laoag.
Segun ken ni Andres, daytoy ket gapu ta bassit laeng dagiti naglakoan da gapu ta manmano dagiti naggatang.
Mamati a gapu kadagiti naglabas a bagyo ket bassit dagiti naapit dagiti mannalon a maysa kadagiti aggatgatang isut a naapektaran ti panagbiag da.
Kuna na a madlaw ti panagrigat ti tattao ita a tawen gapu ta bassit laeng dagiti naggatang ti prutas, no ikompara iti napan a tawen.
Innayon na a nangin-ngina pay ti presyo dagiti prutas itay napan a tawen ngem ad-ado ti naggatang no ikompara ita a tawen.
Malaksid iti kinarigat ti panagbiag, maysa pay a makita a rason ni Andres no apay bassit ti naglakoan da ket gapu ta ado da a naglako.
Inpetteng na a nakaad-ado dagiti outsider a napalubusan nga aglako, ken arigna ad-adda pay nga isuda ti maipray-prayoridad ngem isuda nga aglaklako iti tiendaan ditoy ciudad ti Laoag.
