LAOAG CITY – Maysa a misteryoso nga estatua ti babai a mapapati nga addan ti dua a ribu ti kabayagnan ti naduktalan nga inabandonar iti maysa a pagbasuraan nga asideg iti siudad ti Thessaloniki.
Basar iti report, maysa a residente ti nakakita ti 80 a sentimetro ti marmol a rebulto nga awan ti ulona a nakaikabil iti maysa a nangisit a garbage bag iti asideg ti pagbasuraan iti Neoi Epivates.
Insigidana nga inpakaammo kadagiti otoridad a timmawag kadagiti eksperto tapno arisiten ti balor ken naggapoanna daytoy.
Iti umuna a panangtingiting ti arkeologo, naammoan a daytoy ket idi pay panawen ti Hellenistic ti rebulto, maysa a namaris a yugto iti pakasaritaan ti arts ken culture kalpasan ti panangsakup ni Alexander the Great a mapattapatta a napasamak iti nagbaetan ti 320 agingga iti 30 B.C.
Naikabilen ti estatua kadagiti eksperto para iti naun-uneg a panangtingiting ken maipadalan iti panangtaripato iti lokal nga ahensia iti nagkauna nga artifact.
Kabayatanna, nangiwayat ti imbestigasion ti pulisia tapno ammoen no asino ti nangibelleng ti nasao nga estatua. Maysa a lalaki ti naimbitaran iti police station tapno mapagsaludsudan ngem nawaya-wayaan met laeng ken awan ti naipila a kaso kenkuana.
Saan a daytoy ti umuna a gundaway nga adda ti naduktalan a nagkauna a banag idiay Greece. Idi Disiembre 2024, maysa nga estatua ni Hermes manipud idi panawen ti Romano ti nakali dagiti mangmangged kabayatan nga agin-install ti natural gas pipeline nga asideg iti Acropolis.
