LAOAG CITY – Inpasingked ni Vice mayor Vicentito Lazo nga ar-aramiden da amin a kabaelan da iti panangidaulo ni Mayor Michael Marcos-Keon tapno masolbar dagiti nakaad-ado a problema iti Laoag City General Hospital (LCGH) ditoy ciudad ti Laoag.
Inlawlawag na a masapol a sangwen da dagiti problema iti LCGH tapno mapapintas ti serbisyo iti nasao nga ospital.
Inbatad na nga adda dagiti equipments a nagatang iti LCGH a saan pay a pulos a naus-usar kas ti anesthesia machines a kurang ti partes na, dialysis machines, perdi a CT scan, saan a maus-usar nga elevators ken dadduma pay.
Saan a naliklikan ti bise mayor ti nangbabalaw ti naglabas nga administrasyon gapu ti kaado dagiti problema iti nasao nga ospital.
Inadmitir ni Lazo a saan a nalaka ti mangsolbar ti nagdakkel a problema ti LCGH ngem masapol a sangwenda daytoy.
