LAOAG CITY – Umaboten iti 18 a milyon a pisos ti naglakoan dagiti Micro Small and Medium Enterprises wenno MSMEs ditoy Ilocos Norte a makiparpartisipar iti Mercato ni Nanay Ces iti napalabas a dua a tawen.
Daytoy ti inpakaammo ni Bise Gobernador Cecilia Araneta Marcos a kangrunaan nga adda iti likud ti pannakaisayangkat ti nasao a programa para kadagiti babassit a negosyo.
Immuna iti daytoy, inlawlawag ti bise gobernador a namunganay ti panangisayangkat ti nasao a programa bayat ti pandemia a gubuay ti COVID-19 nu sadino a kimmapsot met dagiti babassit a negosyo.
Kabayatanna, inbatad na nga iti baet a pumpinpintasan ti sitwasyon ket nagtutuloy ti programa nu sadino a ti kaudian a nakaisayangkatanna ket iti siudad ti Batac babaen iti Summercato ni Nanay Ces.
Impalgakna a sumagmamano dagiti baro nga Micro Small and Medium Enterprises ken grupo a nakipaset iti nasao a programa.
Segun iti bise gobernador, kangrunaan ditoy ti Special Education Group manipud iti ili a Vintar.
Kunana a kaaddoan kadagiti inlako dagitoy a produkto ket aramid dagiti ubbing manipud iti nasao a grupo.
Impannakkelna a ti nasao a grupo ti kadakkelan ti napaglakoan iti pannakaisayangkat ti nasao a programa.
Inbunannagna a karaman pay kadagiti damona ti nakipaset iti Summercato dagiti estudiante ti Ilocos Norte College of Arts and Trade a mangal-ala ti entrepreneurship course.
Innayonna a daytoy ti mangipamatmat a sabali manen a grupo dagiti natulungan kangrunaanna kadagiti “children with special needs”.
