LAOAG CITY – Dumanonen iti 88 a milyon ti bilang dagiti Pilipino a nakaparehistro iti babaen ti Philippine Identification System (PhilSys) ID wenno national ID.
Immunan nga inbatad ti gobierno nga adda ti manamnama a 92 a milyon a bilang ti agparehistro iti babaen ti national ID.
Segun ken ni Deputy National Statistician Fred Sollesta, asidegen a madanonda ti nasao a bilang iti babaen ti panangiyasidegda ti serbisio kadagiti umili.
Manipod iti agarup 88 a milyon ket naaramiden a naited wenno naipatulod ti agingga 51.5 a milyon a physical card kadagiti akinkukua idinto a tallo a milyon met ti mannarimaan a maipatpatulod kadagiti akinkukua.
Iti agdama, adda ti 25 a digital version wenno dagiti ID a mabalinen a maimprenta kadagiti registration center ti ahensia.
Kabayatanna, ti national ID ket maibilang nga epektibo iti pakabigbigan dagiti Pilipino.
