LAOAG CITY – Naragsak nga inpakaammo ni Mr. Andy Doronio, ti agtagikua iti Cake Time iti Brgy. 2 ditoy siudad ti Laoag a nagduduma dagiti cake nga idiayada kagiddan ti panangselebrar ti Mother’s Day inton bigat, Mayo 12.
Segun kenkuana, nagpatpatnag pay daytoy a nagaramid kadagiti cake gapu iti adu nga order a naawatna a mangipaneknek a naimas ti ilaklakoda a cake.
Inbatadna a sumagmamano nga aldaw sakbay ti Mother’s Day ket adun dagiti nagpareserba kadakuada isu a saanna a mailinged a makumikom isuna kadagitoy a gundaway.
Kunana nga adda ti in-post-na iti online a pakakitaan amin dagiti pagpilian a klase ti cake dagiti constumers-da tapno alistoda laeng nga agorder apaman a tumawagda kadakuada.
Inlawlawagna nga iti agdama ket addan ti nasurok 50 a cake ti naipareserban ken mabalinda pay nga umawat agingga a kabaelanda pay a makaaramid ti cake.
Mainaig iti daytoy, kuna ni Doronio a maysa kadagiti kangrunaan a patok nga ilaklakoda a cake ket ti
cupcake bouquet, birthday cakes, cake plus flower combo ken dadduma pay.
Innayonna nga adda ti panagkissayda ti presio manipod iti original price dagiti cake nga ilaklakoda kas promo para kadagiti customers-da.
Inpakaammona a dumanon iti 200 a pisos ti bento cake, bento cake with floral ket 250 a pisos ken bou-cake wenno agtipon ti boquet ken cake a sag-1,500 a pisos.
Kabayatanna, naammoan a malaksid kadagiti cake ket adda pay ti mango ice cream, ensaymada ken bread roll ti ilaklakoda.
