LAOAG CITY – Inlawlawag ni Jamaica Tagalicud no apay nga insanod na ti impila na reklamo kontra kenni Angelica Joyce Nacino, ti maitudtudo a lider ti Peer to Peer Investment Scam (P2P) ditoy ciudad ti Laoag.
Kuna ni Tagalicud a kalikagum na a magun-od ni Nacino ti hustisya babaen iti pannakaduktla no siasinno dagiti nagala ti kwarta.
Maipalagip idi Disyembre 24, natiliw ni Nacino babaen ti entrapment operation nga inwayat ti PNP Laoag kalpasan a nagreklamo ni Tagalicud a maipagarup a dawdawatan na daytoy ti kantidad.
Segun kenni Tagalicud, ni Nicole Monroy, maysa kadagiti Area Representatives ti P2P iti nangplano iti nasao nga operasyon.
Kunana nga inaramid da ti nasao a plano tapno maimameg ni Nacino iti kaso a naipila kenkuana.
Inbatad na a nagtalek daytoy kenni Monroy tapno maisalakan na iti bagabagi na ken dagiti investors na ngem nagan da Monroy ken dagiti dadduma nga ARs laeng iti madaldalosan.
Nakasagana ni Tagalicud a tulungan ni Nacino babaen iti panangibaga na nga awan kenkuana iti kwarta dagiti investors.
Inpasingked na nga ad-adu ti cash back a maal-ala ni Monroy ngem iti cash in nga itited na.
