LAOAG CITY – Inbatad ti Commission on Population and Development (CPD) nga iti baet ti panagbaba ti bilang dagiti agsiksikog a babbai ditoy pagilian nga agtawen ti 15 agingga iti 19 kadagiti naglabas a tawen, agtultuloy met a ngumatngato ti bilang dagiti masiksikugan nga ubbing a dagitoy ket agtawen ti 10 agingga iti 14.
Rimuar daytoy a trend kagiddan dagiti selebrasyon ti aldaw dagiti puso no sadinno nga agpanpannuray dagiti imahe ti romansa ken panagibunong ti condom ken impormasyon.
Iti likudan daytoy, nagballaag dagiti opisyal iti ngumatngato a risgo para kadagiti ubbing nga agsiksikog.
Basar iti datos ti Commission on Population and Development, bimmaba manipod iti 8.6% idi 2017 agingga iti 5.4% idi 2022 ti porsiento dagiti babbai nga agtawen ti 15 agingga iti 19 a nangrugi a naganak.
Kabayatanna, ngimmato met ti bilang ti live births iti tawen a 10 agingga iti 14 manipod iti 2,411 idi 2019 agingga iti 3,343 idi 2023, maibasar iti datos ti Philippine Statistics Authority.
Inbatad ni Commission on Population and Development Undersecretary Lisa Grace Bersales a ti nasao a bilang ket makaalarma unayen.
Dinakamat ni Bersales ti impluwensiya ti social media kas maysa kadagiti factor, ngem inpetteng na a kasapulan ti panagmaymaysa para iti pannakasolbar daytoy a problema.
Innayon ni Bersales a kasapulan ti naan-anay a panagsanay dagiti mangsursuro tapno agbalin a komportable iti panangisuro ti sexuality education.
