LAOAG CITY – Napasamak ti nagsisina nga uram iti kapanagan,aglalo iti igid ti karayan, nangrugi iti Barangay 17, 18, 19 agingga iti Barangay Camanggaan ditoy ciudad ti Laoag.
Daytoy ti inbatad ni Fire Senior Inspector Edison Reyes, ti City Firemarshall iti Bureau of Fire Protection ditoy ciudad ti Laoag.
Segun ken ni Reyes, nagduduma ti nakita da a rason iti pannakauram ti nagduduma a paset ti kapanagan ken alisto a nagkayamkam ti apoy gapu ta nabengbeng dagiti root ken napigsa pay ti angin.
Innayon na nga arigna nairanta dagiti napasamak nga uram gapu ta adda dagiti basura iti igid ti dike a napuuram, idinto nga adda met dagiti kayo a naummong a nauram.
Mainaig iti daytoy, nagpanawagan ni Reyes a saan koma nga agpuur dagiti residente kadagiti basura da iti igid ti dike tapno maliklikan ti uram, ken iti babaen daytoy ket makainot da met ti gas, aglalo ita ta agtultuloy ti panagngato ti presyo dagiti produkto a petrolyo.
Kabayatanna, inpakaammo ni Reyes a sipud nangrugi ti fire prevention month ita a bolan ket nakaad-adon dagiti rinespondean da a grass fire ken garbage fire ditoy ciudad ti Laoag.
