LAOAG CITY – Napalaos ti ragsak da Mr. and Mrs. Joel Ignacio iti Brgy. Callaguip iti ciudad ti Batac iti panagbalin a Top 4 ti anakda a ni Chris Danielle Ignacio iti napalabas a Physical Therapist Licensure Examination.
Segun iti ina nga Ignacio, saanda a ninamnama a makapasa ti anakda gapu ta nagsakit daytoy sakbay ti eksaminasyon.
Nupay kasta, kuna na a dakkel iti panagyamanna iti Diyos gapu ta iti laksid ti nagbalin a sitwasyon ti anakna ket saan a naapektaran ti panageksamen na.
Kunana a ni Chris ti inauna nga anakna ken ti koma kurso nga alaen na idi sumrek iti kolehiyo ket BS Biology ngem kalpasan ti entrance examination ket inpakaammo na kadakwada a Bachelor of Science in Physical Therapy ti kayatna ken saanda a nagpangadua a nangsuporta kenkuana.
Innayon na a plano ni Chris ti ag-masteral kalpasan ti pannakaipasana ti board examination.
Naamoan a dagiti nagannak ni Chris ket empleyado iti Mariano Marcos State University no sadinno a ti amana ket iti motorpool ken ti ina na ket iti registrar.
