LAOAG CITY – Nagun-od ti US Gymnastic team ti balitok a medalya iti agtultuloy a Paris Olympics 2024.
Indauluan ni Simone Biles ti USA Gymnast team iti balligi para iti maikalima a balitok a medalya iti Olympics.
Kaduana iti team da Suni Lee, Jordan Chiles ken Jade Carey kontra ti Italy ken Brazil iti team in final.
Nakompleto ni Biles amin nga uppat nga exercises kas iti vault, uneven bars, balance beam ken floor.
Agdagup iti walo a daras a nakidalip ni Biles iti Olympic podium gapu ta nangabak daytoy iti uppat a balitok ken maysa a bronze idi 2016 Rio Games ken maysa a silver ken bronze medal iti 2020 Tokyo Olympics.
Kabayatanna, nagbalin a star-studded dagiti agbuybuya gapu ta malaksid iti asawana a ni NFL star Jonathan Owens, agbuybuya met da actress Nicole Kidman, Natalie Portman, Jason Kelce ken tennis star Serena Williams.
