LAOAG CITY – Agtultuloy ti imbestigasyon ti Philippine National Police (PNP) mainaig iti maipagarop a peke a 500 peso bill a naibayad iti maysa nga aglaklako iti merkado publiko ditoy ciudad ti Laoag.
Segun kenni Pol. Lt. Col. Joseph Baltazar, ti chief of police ditoy ciudad ti Laoag, saan da a kinasoan ti baket a nagbayad ti maipagarop a peke a 500 peso bill gapu ta possible a saanna nga inpagarop a peke daytoy.
Kunana a possible nga adda ti nagbayad kenkuana ti peke a 500 iti kallabes nga isu ti naisupli na iti gimmatang kenkuana.
Kabayatanna, inpakaammo ti Civil Security Unit a naiget ti koordinasyon da iti Philippine National Police tapnu maduktalan nu siasinno ti naggapoan ti peke a P500 peso bill.
Segun kenni Mr. Jr. Gadia, ti mangidadaulo iti Civil Security Unit iti merkado publiko ditoy ciudad, napasamak ti insidente iti parbangon ken awan Closed-circuit television (CCTV) rason a marigatan da a mangbigbig ti kinatao ti suspek.
