LAOAG CITY – Inikkan ti royal title ni King Charles III ti naidumduma a breed ti kalding a Golden Guernsey Goat.
Idi Hulio 16, bimmisit ni King Charles III ti United Kingdom iti Guernsey. Ti Guernsey ket maysa kadagiti Channel Islands a masarakan iti English Channel nga asideg iti kabaybayan ti Normandy, France.
Maysa daytoy a crown dependency ti United Kingdom, mangipasimudaag nga adda ti bukudda a gobierno ken dagiti linteg ngem ti United Kingdom ket responsable para iti depensa ken internasyonal a representasion daytoy.
Ti Guernsey ket am-ammo pay iti agrikultura nangruna kadagiti baka ken kalding a mabigbig iti nangato a kalidad ti gatas.
Iti panagbisita ti ari iti nasao a lugar, ti maysa kadagiti gagemna ket maikkan ti royal title ti breed ti kalding a Golden Guernsey Goat ken maawagan daytoy a Royal Golden Guernsey Goat.
Daytoy ti umuna a gundaway iti pakasaritaan a nangipaay ti royal family ti nasao a titulo iti maysa a livestock breed. Napanunutan a maikkan ti royal title gapu ta ti breed daytoy ket asideg a ma-extinct ken maikonsiderar kas “at risk” kas maibasar iti U.K.’s rare breeds watchlist.
Mamati isuda a no maaddaan daytoy ti royal title ket maaddaan ti awareness ti kaadduan iti pannakaibus ti puli dagiti Royal Golden Guernsey Goat.
Iti royal ceremony ti nagbalin a representative ti amin dagiti Golden Guernsey Goat ket ni Summerville Tamsin tapno isuna ti mangawat ti titulo manipud ken ni King Charles III. Ti royal title ket applicable kadagiti amin a Golden Guernsey Goat iti intero a lubong.
Ti breed a Golden Guernsey Goat nga inikkan ti royal title ni King Charles III.
