LAOAG CITY – Maysa a kontrobersial nga estatua ti higante nga ima nga addaan ti rupa ti maikkaten iti Wellington, New Zealand, kalpasan ti lima a tawen a pannakaikabil daytoy iti tuktok ti maysa a building iti nasao a siudad.
Ti estatua a napauloan iti “Quasi,” ket pinartuat ti Australian artist a ni Ronnie van Hout.
Daytoy ti immuna nga inpakita iti Christchurch Art Gallery idi 2016 sakbay a naiyakar iti City Gallery Wellington idi 2019.
Iti kangato a 16.4 feet, dagus daytoy a nagbalin a kontrobersial ken naawagan a nakabutbuteng ti kaadduan dagiti residente.
Inbatad ni Jane Black, Chair ti Wellington Sculpture Trust, ma-miss-da gapu iti naidumduma a presensia daytoy ken iti panangnayon iti panagbalin a talentado dagiti taga-Wellington.
Nakaiskedyul daytoy nga ikkaten ita a Nobiembre ken maikabil idiay Australia ngem awan pay ti kasiguradoan a lokasion no ayanno ti panangikabilanda.
