LAOAG CITY – Inpasigurado ni PNP Provincial Director Police Supt. Jose Melencio Nartates Jr. a naiget a maiyimplementar ti memorandum circular nga aggapo iti opisina ni Presidente Rodrigo Duterte ken ti National office ti PNP.
Sungbat daytoy ni Nartates iti nagbalin a pammilin ni Governor Imee Marcos a naiget a maipatungpal ti nasao a memorandum circular a mangipawpawil kadagiti amin nga empleado ken opisyal ti gobierno a sumrek ti pagsusugalan.
Inpakaammo pay ti provincial director nga addan ti inaramid na a plano tapno ad-adda pay a mapaigetan ken matiliw dagiti opisyal ken empleado ti gobierno a sumrek ti pagsusugalan, a pakairamananen ti casino.
Innayon na a nangipatulod payen ti surat iti opisina ni Vice Governor Angelo Marcos-Barba, League of Municipal Mayors, ABC ken Department Heads tapno kiddawen na ti tulong ken suporta da ti nagbalin a pammilin ni presidente Duterte a kalikagom a maipatungpal ni Governor Marcos.
Segun pay ken ni Nartates, mangideploy kadagiti kameng ti pulisya kadagiti nagduduma a casino ken galyera tapno makita no siasinno dagiti sumsumrek.
