LAOAG CITY – Naiget nga ipatungpal ti Department of the Interior and Local Government (DILG) ti Anti-Epal policy iti intero a pagilian.
Iti babaen ti Memorandum Circular No. 2026-006, naibilin iti amin a lokal a gobierno ken opisina ti Department of the Interior and Local Government nga ikkaten a dagus ti nagan, ladawan, logo, slogan ken aniaman a simbolo dagiti opisyal kadagiti proyekto a pinondoan ti gobyerno.
Inpetteng ni Interior Secretary Jonvic Remulla a dagiti proyekto ket manipod iti buwis ti umili ken saan a rumbeng nga aramiden a personal a billboard dagiti politiko.
Inpetteng ti Department of the Interior and Local Government a ti public office ket public trust, ken ti panagusar ti pondo para iti bukod a pannakapapigsa ti imahen ket mailabsing iti Konstitusyon, Code of Conduct, ken pagannurutan ti Commission on Audit.
Pinapigsa pay daytoy ti 2026 General Appropriations Act a naiget a mangipawil iti panagikabil ti nagan ken ladawan ti opisyal kadagiti proyekto a pinondoan ti publiko.
Nabilin metten dagiti amin nga opisyal a dagus nga urnusen ken ikkaten dagiti materyales a saan a sumursurot ken pagsungbaten dagiti mangidaulo ti opisina.
Kagiddan iti daytoy, nagpanawagan manen ti Department of the Interior and Local Government ken ni Presidente Ferdinand Marcos Jr. a pagtalinaeden a nadalos iti epal ken personal branding ti amin a proyekto ti gobierno ken ginutigot na ti publiko nga ireport dagiti manglabsing iti pagannurutan.
