LAOAG CITY – Aksidente a naipan iti uneg ti lapayag ti agtawen ti uppat nga ubing ti naikkat a ngipen na iti ciudad ti Batac.
Daytoy ti kinumpirmaran ni Dr. Ronald Sadian, ENT (ear, nose, and throat) specialist iti Mariano Marcos Memorial Hospital and Medical Center iti ciudad.
Segun kenni Dr. Sadian, naibaga kenkuana dagiti nagannak ti ubing nga adda ti makitkita da a puraw a banag iti ear canal daytoy.
Inlawlawag na a sinukit dagiti nagannak ti nasao a banag iti lapayag ti ubing ngem napaay da a nangikkat isut gapo na nagpakonsuntar kenkuana.
Inbatad na nga awan met ti marikrina ti ubing a sakit iti lapayag na ken makangeg a nasayaat ngem ti naibaga ti menor de edad a no tunggal agkurikor ket madutdutok na ti eardrum na.
Inpalgak met ti doktor a no agkurikor ti ubing ket maiduron met ti ngipen isut gapo na a maisagsagid iti eardrum daytoy.
Mainaig iti daytoy, kuna ni Dr. Sadian a saan na nga ammo idi damo a ngipen ti adda iti uneg ti lapayag ti ubing gapo ta ipetteng met daytoy nga awan ti inpan na kasta pay kadagiti kabsat wenno kaay-ayam na.
Kunana nga idi naikkat na ti ngipen wenno ti premolar tooth manipud iti lapayag ti ubing ket ditoy na met a naduktalan na nga inpan ti menor de edad ti ngipen na iti sirok ti pungan gapo iti pammati.
Naamoan a basar iti pammati dagitoy, no maikkat ti ngipen ket ipan iti sirok ti pungan no maturog ken adda ti sumangbay a Tooth Fairy a mangala iti ngipen ken sukatan na ti kwarta.
Patien ni Dr. Sadian a posible a naikkat ti pungan bayat a matmaturog ti ubing ken ditoy a naiddaan na ti ngipen a nangitunda metten ti pannakaipan daytoy iti uneg ti lapayag na.
Innayon na a mapatta-patta nga umaboten iti tallo nga aldaw nga adda iti uneg ti lapayag ti ubing ti ngipen na.
Kabayatanna, binalakadan ni Dr. Sadian a nasken a saan nga ipalubos dagiti nagannak nga ipan dagiti ubbing ti ngipen iti sirok ti pungan tapno maliklikan ti madi a pasamak.
