Naikkat a Bise Mayor idiay Marcos Ilcos Norte, naisublin iti puwesto na

LAOAG CITY – Agsubli kas Bise Mayor iti ili a Marcos ni Bise Mayor Rofel Pambid.

Inpasingked daytoy ni Sang. Bayan Member Jonnel Rosqueta iti nasao nga ili.

Segun kenni Rosqueta, Bise Mayor ti pagsublyanan ni Pambid a posisyon gapo ta ni pay laeng Mayor Jessie Ermitanio ti agdama a Mayor uray nakabalod.

Daytoy ket gapo ta saan pay a nakonbiktaran ni Ermitanio iti agsusukot a kaso a sangsanguen na.

Gapo iti daytoy, agsubli metten kas Sang. Bayan Member ni Acting Mayor Alan Coloma.

Mainaig iti daytoy, agbalin pay nga Acting Mayor ni Pambid gapo ta ti agdama ket nakabalod ni Mayor Ermitanio gapo ti pannakaitudo na a mastermind iti pannakatay ti dati a Mayor Arsenio Agustin.

Maipalagip nga inikkat ti Ombudsman iti serbisyo ni Pambid gapo ti kaso a naipila kontra kenkuana a panagsalunagsing ti RA 7160 wenno Local Gov’t. Code ken ti RA 6713 wenno Code of Conduct and Ethical Standards ngem nangipila ti Motion for Reconsideration ket napatgan met daytoy.