LAOAG CITY – Awan pay ti lima a minuto iti kaalisto iti panangaprobar ti plenario ti Senado ti nailungalong a pundo ti Office of the President (OP) a dumanon iti P27.3 billion ken ti P854 million a budget ti Presidential Management Staff (PMS) para iti 2026.
Iti plenary deliberations ti Senado para iti budget ti Office of the President para inton sumaruno a tawen, immannugot dagiti senador nga iyendorso ti budget ti Office of the President ken Presidential Management Staff para iti panangaprobar iti maikadua a pannakaibasana.
Inbatad ni Senate Committee on Finance Chairman Senador Sherwin Gatchalian, daytoy ti maikapat a gundaway a simmango iti Senado ni Executive Secretary Ralph Recto, nga iti kallabes laeng ket nagserbi kas sekretario ti Department of Finance (DOF).
Nagmosyon met ni Senador Jinggoy Estrada a lippasen ti interpelasyon para iti Office of the President ken Presidential Management Staff budgets kas panangipakita ti institutional courtesy iti executive body a patas iti legislative body ken kas panangrespetar metten iti Presidente a dati a kaduada iti Senado idi 15th ken 16th Congress.
Ngimmato ti 66.2 million ti budget ti Office of the President gapu ta ti dakkel a paset daytoy ket mailatang para iti panag-host ti Pilipinas iti ASEAN Summit ken dagiti adda ti pakainaiganna iti panagtataripnong kadagiti sumaruno a tawen.
