LAOAG CITY – Naannad a sinarabo ti sumagmamano a sektor iti Northern Mindanao, karaman dagiti nagannak ken ahensya ti gobierno ti House Bill 7887 wenno Children’s Gadget Use Regulation Act a gagem na nga irregular ti panagusar ti gadgets dagiti ubbing.
Inpila ni Asenso Pinoy Party-list Rep. Henry Oaminal Jr. t gakat a mangipawil ti screen time kadagiti ubbing nga agtawen ti zero agingga iti dua, manglimitar kadagiti agtawen ti dua agingga iti 12 ken mangikeddeng ti regulasyon para iti agtawen ti 13 agingga iti 17 kadagiti pagadalan ken komunidad.
Nupay kasta, kuna ni Crystal Raro ti University of Science and Technology of Southern Philippines a masapol a papigsaen ti kabaelan dagiti nagannak gapu ta kangrunaan a responsibilidad da ti magtaripato kadagiti ubbing ken agpannuray ti linteg no iti maipapan iti pamilya.
Inrakurak na pay ti panagamak na kadagiti probisyon a mabalin a pannakibiang iti pribado a biag ti pamilya.
Nangipaay met ti “conditional” support ti Department of Social Welfare and Development-Northern Mindanao maibasar iti prinsipyo ti best interests dagiti ubbing.
Segun ken ni social worker Grace Dael, Children Sector Focal ti DSWD-10, bigbigbigen ti ahensya ti panagkasapula a protehiran dagiti menor de edad kontra iti digital harm ngem masapol nga agtalinaed a “subsidiary in nature” ti pannakibiang iti estado.
Nailanad iti gakat ti non-intrusive monitoring ken boluntaryo a partisipasyon dagiti pamilya, nga addaan ti naiget a panagbalin a confidential ti impormasyon makalap ti barangay health workers.
Adda ti papel iti pannakaipatungpal daytoy ti Department of Health, dagiti local government unit, ken ti Department of the Interior and Local Government.
Inpetteng ni Oaminal a nakatutuk ti gakat iti parental ken communal approach, ken dagiti probisyon para iti nagannak ket advisory ken supportive, a mangitantandudo iti edukasyon ngem ti mangipatungpal ti pannusa.
