LAOAG CITY – Inbatad ni Police Lt. Col. Amador Quiocho, ti chief of police ditoy ciudad ti Laoag a nakigtot da iti inpadamag ti maysa nga estasyon ti radyo ditoy probinsya nga adda dagiti armado a lallaki iti Barangay Metro La paz ditoy ciudad.
Iti eksklusibo nga interview ken ni Quiocho ditoy Bombo Radyo, inbatad na a nagturong da a dagus iti lugar ken nakasarita da pay ti barangay kagawad a maibagbaga a nakakita kadagiti armado a lallaki, ngem negatibo ti nasao a report.
Inlawlawag ni Quiocho a basar kadagiti residente ket adda laeng ti nakita da a maysa a tao a nakaiggem ti sako ngem saan da a makumpirmaran no paltog ti nagyan na.
Innayon na a mabalin a napan laeng nangayo ti nakaiggem ti sako iti igid ti baybay ken inatap da a paltog ti karga ti bitbit na a sako.
