LAOAG CITY – Naipagagangayen ti panagpasar kadagiti pannubok iti biag ngem nakadepende iti tao no kasanu na a solbaren wenno imanihir tapno saan a maapektaran ti panagbiag.
Daytoy ti inbatad ni Mrs. Jeanette Fontanilla, maysa kadagiti mangisursuro kadagiti skills training iti Technical Education and Skills Development Authority.
Para ken ni Fontanilla, no adda ti problema wenno pannubok iti biag ket masapol a sangwen ngem saan nga isu lattan ti panpanunuten.
Inadmitir na nga adon dagiti nagdalanan na a problema ngem ti kanayun a panpanunten na ket saan nga ipaay ti Diyos ti aniaman a pannubok iti biag na no ammo na a saan a kabaelan a solbaren.
Kuna ni Fontanilla a malaksid iti saanna unay a panangikaskaso kadagiti sumangbay a problema iti biagna ket ti pay maysa a sikreto na tapno agtultuloy ti naannayas a panagbiagna ket ti panagtalinaed a natibker.
Iti Bombo Success Story a maysa kadagiti segment ti Good Morning Philippines, inistorya ni Fontanilla dagiti rigat a nagdalanan da a sangapamilya aglalo ti nagbalin a sitwasyon da iti agad-adal da paylaeng nga agkakabsat.
Segun kenkuana, innem da nga agkakabsat, ti ama na ket maysa a pulis idinto a ti ina na ket agar-aramid kadagiti native delicacies kas ti bibingka, puto, suman ken dadduma pay.
Inpakaammo na a gapu iti kinarigat ti panagbiag ket kasapulan a tumulong da amin nga agkakabsat iti negosyo ti ina da.
Babaen ti panagtitinnulong da a sangapamilya ken ti pannarabay ti namarsua ket nakaturpos da amin nga agkakabsat iti kolehiyo ken naaddaan da ti napintas a trabaho.
Innayon na nga iti met panagasawa ken panangbukel na ti bukod a pamilya ket naparaboran da nga agasawa ti innem nga annak.
Inpanakkel ni Fontanilla a nakaturpos metten iti kolehiyo dagiti lima nga annak na ken ti laengen inaudi na ti agbasbasa.
