LAOAG CITY – Inlawlawag ni Atty. Julius Balbas, ti Comelec Officer ditoy ciudad ti Laoag ti inparuk-at a Resolution No. 10746 ti Commission on Elections (Comelec).
Inbatad na a naipalaon iti nasao a resolusyon a maipawil ti aglako ken gumatang iti aniaman ti klase na nga arak mangrugi iti Mayo 8 agingga iti Mayo 9 a kaaldawan ti eleksyon intono 2022.
Nupay kasta, nailanad iti resolusyon nga adda dagiti maipaayan ti exemption no sadinno a mapalubusan nga aglako ti arak dagiti hotels, bars ken restaurants no adda ti maala da a permit manipud iti nasao nga ahensya.
Malaksid iti daytoy, inbatad pay ni Balbas a no adda iti uneg ti pagtaengan ket mabalin ti uminom ti arak gapu ta ti naiget a maipawil ket ti panaggiinom kadagiti pampubliko a lugar.
Kabayatanna, inpakaammo ni Balbas nga iti met Resolution No. 10728 ket ti pannakaestablisar dagiti checkpoints gapu iti maipatungpal a comelec gun ban ken checkpoints ti PNP.
Inpetteng na a no agchekcpoint ti PNP ket visual laeng ti panagkita dagiti otoridad ken masapol nga adda da iti nalawag no sadinno a maipawil ti aglukat iti lugan dagiti pribado nga indibidual.
Nupay kasta, kuna na no adda ti makita dagiti otoridad a banag ken rason tapno lukatan da ti lugan ti maseknan ket nawaya dagitoy a mangaramid.
Mainaig iti daytoy, inpakaammo ni Balbas nga uray no saanen a nakaduty ti maysa nga agserserbi iti intelligence section ket mabalin latta nga agikot ti paltog.
Innayon na a no iti biang met dagiti kandidato ket otomatiko a kanselado ti panagikot da ti paltog malaksid laeng no adda ti pammalubos ti comelec.
