LAOAG CITY – Inrakurak ni Vice Mayor Oscar Aguinaldo iti ili ti Pasuquin nga awan ti maris politika na ti pannakaaprobar iti annual budget iti nadakamat nga ili.
Inadmitir na nga adda ti inikkat da iti nailungalong nga annual budget iti ili da gapo ta adda dagiti maipagarup a nainayon a saan a nainkalintegan.
Segun kenkuana, adda ti 9-milyon a naipalipit iti budget a maiyalokar koma iti opisina ti mayor ngem inikkat da.
Kuna na pay nga adda dagiti pondo a naiyalokar iti sumagmamano a proyekto nga inikkat da kas iti solar lights gapo ta daytoy ket nalawag a duplication agsipud ta addan ti kastoy a programa ti 1st congressional office ditoy probinsya.
Nupay kasta, iti social services ket napagbalin a nasurok ng 6-milyon a pisos manipod iti 300 a ribo a pisos nga immuna a naiyalokar.
Innayon na a ti dati a budget da ket 208 million ngem napagbalin a 215 million ti annual budget iti ili ti Pasuquin gapu ta nagnayun da iti 7-milyon a pisos para iti sweldo ken dadduma a benepisyo dagiti empleyado iti lokal a gobierno.
Kabayatanna, inpetteng ti bise mayor nga awan ti kinapudno na a tallo da laeng nga immanamong iti pannaka-aprubar iti budget gapu ta adda amin pirma dagiti kameng ti konseho kadagiti dokumento.
Inpakaammo na a kalpasan nga inaprubaran ti konseho ti annual budget ket insumitir da a dagus daytoy iti opisina ti mayor ngem in-veto na isut gapuna a reenacted budget iti ili ti Pasuquin iti agdama.
Inkalintegan ti bise mayor a saan da nga agpulpulitika no di ket ar-aramiden da laeng ti pagrebbengan da nga opisyal iti ili ti Pasuquin.
Maipalagip nga immunan nga adda dagiti opisyal iti ili ti Pasuquin a nangirakurak nga adda ti maris politika na iti pannakakissay iti annual budget gapu ta ti 20% development fund a paset koma ti annual budget ket napagbalin a 11% a maipagarup a maikontra daytoy iti linteg iti pagilian.
