LAOAG CITY – Inpasingked ni Doctor Charito Malicad, ti Information Officer iti gobierno lokal ditoy ciudad ti Laoag a peke ti statement a naipost iti maysa a pagiwarnakan a maipagarop nga aggapo ken ni Mayor Michael Marcos-Keon.
Basar iti post a rumrumuar nga aggapo ken ni Mayor Keon, dinillaw na ti masansan a panagusar da senador Imee Marcos ken presidential candidate Bongbong Marcos ti sarita nga “unity” idinto a saanda a maiyaplikar daytoy iti mismo a pamilya da.
Inpalgak ni Malicad a nalawag a peke ti nasao nga statement gapu ta iti panagsukisok da ket awan ti kastoy a post iti official page ti pagiwarnakan.
Innayon na a nalidem pay a makaaramid ti kastoy nga statement ti nasao a pagiwarnakan gapu ta awan dagiti miembro da a nangint-interview ken ni Mayor Keon.
Kuna pay ni Malicad a nagkari ti nasao a pagiwarnakan nga aksyunan da daytoy a pasamak ken addan iti post da iti official page da a saan nga aggapo kadakuada ti maibagbaga nga statement ti mayor.
