LAOAG CITY – Naglikudan ni Barangay Chairman Oliver Valite iti Brgy. Naglicuan iti ili ti Pasuquin nga awan ti naawat ti barangay nga 600 a ribo a pisos a donasyon.
Kuna na nga uray lumned dagiti opisyal ti barangay ket awan ti naawat da a gatad.
Segun kenni Valite, naibaga iti post iti social media nga inted ti pamilya ni Mr. Willie Florida, nga akin kukua iti Florida Bus ken adda ti sanikua na iti barangay da ti nasao a gatad.
Inbatad ni Valite nga iti inted ti nasao a pamilya ket 75 a sako ti bagas para kadagiti pamilya iti barangay da kabayatan ti enhanced community quarantine nga isu met ti naibunong idi Abril 13, 2020.
Nasakit ti rikna ni Valite kalpasan a timpuar ti isyu nga adda ti naidonar nga 600 a ribo a pisos idi ta awan ti naw-awat da ken awan ti kinapudno na.
Nagsaludsod pay ti kapitan kadagiti kagawad na ngem nagtalinaed nga awan kadakuada ti nangawat iti maipagarup a donasyon.
Kabayatanna, inbunannag ni Kapitan Valite a nagsarita da iti pamilya Florida ken naibaga pay ti maseknan nga awan ti kinapudno na.
Gapu iti daytoy, plano ti kapitan a maipaayan ti pagmenna-mennaan ti maseknan a nagpost iti social media no saan na a kayat ti agpadespensar iti publiko.
Nakasagana ti pamilya Florida a mangpaneknek nga awan ti indonar da a kuarta.
Innayon ni Valite a nangipatulod ti mensahe ti agnagan ti Elvis Loreto a nagkiddaw ti despensa nga awan ti naidonar a kuarta.
Maiyuswat ti regular session intono Domingo, ken maimbitaran dagiti maseknan a nagpost tapno malawlawagan a naimbag ti timpuar nga isyu.
Inadmitir ni Valite nga adda dagiti nagidonar ti kuarta nga immabot iti agarup 60 a ribo a pisos ngem dagus a naigatang kadagiti relief goods a naibunong kadagiti bumarangay bayat ti ECQ.
