LAOAG CITY – Inbatad ni Engr. Elmer Lagua iti Provincial Administrators Office nga awan ti rumbeng a pagamkan ti publiko seknan iti pananakaisadsad ti barko iti paset ti Barangay Gabu ditoy ciudad ti Laoag.
Segun kenni Lagua, iti kuma Currimao port ti papanan ti barko ngem gapo iti kapigsa ti angin ken dalluyon ket nagpaigid daytoy iti baybay a paset ti Barangay Gabu Sur ken naipakada ti nadakamat nga emergency anchor.
Kunana a daytoy ket mausar para iti dredging project ti probinsya iti Padsan River.
Naamoan nga ita nga aldaw ket maguyod a maipan met iti Currimao Port nga isu ti pagtalinaedan ti barko.
Kabayatanna, kuna met ni Barangay Chairman Gil Ramos a naalarma dagiti kabarangayan na gapo ta saan a naipakammo kadakuada ken addan ti uppat nga aldaw a nagtalinaed daytoy ken damo da a makakita ti kastoy kadakkel na a barko.
Inbatad na a ti kasakit ti nakem na ket no apay nga ita nga aldaw laeng a naipakkammo kenkuana babaen iti maysa a surat.
Inlawlawag na a naibaga kuma met iti barangay no bilang adda met ti maipaay da a tulong ken saan da kuma a nagdandanag iti sumagmamano a rabii.
Nupay kasta, kunana nga iti laksid a naladaw a naipakammo kadakuada ket naalay-ayan ti panagamak da gapo ta naamoan da a mausar daytoy iti dredging.
