LAOAG CITY – Pinalubusan nga insigida dagiti residente iti Brgy 62-B Navotas, ti ciudad ti Laoag ti maysa a pawikan kalpasan a naisadsad daytoy iti igid ti baybay.
Daytoy ti imbatad ni Mr. Miguel Juan, Brgy. Kagawad iti nadakamat a barangay.
Kuna ni Juan nga alas 2:30 ti malem ket adda nakakita a barangay tanod iti pawikan nga adda iti igid ti baybay.
Inlawlawagna a dagos met nga binagkat dagiti baranagay opisyal ti nadakamat a pawikan tapno isubli iti danom.
Innayonna, nga ita man laengen nga adda naisadsad a pawikan iti lugar da, no sadinno idi kallebas ket adda dagiti pawikan a mapan agitlog iti igid ti baybay.
Kabayatanna, iminado ni Juan nga ammo da met a maipawil ti agparti ti pawikan isu nga no adda maisadsad iti paset ti barangay da ket insigidada met laeng nga palubosan.
