LAOAG CITY – Inpakaamo ni Sangunniang Bayan Member ken ti Chairman ti Committee on Transportation Dondee Visaya iti ili ti Bacarra a maisubli manen ti panagisyu ti citation ticket kadagiti tricycle a dumalyasat iti national highway.
Daytoy ket partikular iti paset ti Brgy. 19-Tambidao agingga iti daan nga slaughter house iti Brgy. 10 iti nasao nga ili.
Kuna ni Visaya a kalpasan ti naiyuswat a dry-run iti napalabas nga aldaw ket naisublin ti panagsita kadagiti agsalungasing ti Ordinance 2020-006 a pannakaipawil kadagiti tricycle a dumalyasat iti nadakamat a lugar.
Inpakaamo ti SBM a ti pannakaiyimplimentar ti nasao nga ordinansa ket naipakaamon iti publiko isut gapu na nga awan ti rason a saan a sumurot iti daytoy.
Maipalagip a naruay dagiti nagreklamo gapu iti kellaat a pannakaiyimplimtar ti ordinansa itay kallabes nu man pay saan a pulos a naipakpakaamo daytoy iti publiko.
