LAOAG CITY – Paim-imbestigaran ni Sen. Miguel Zubiri, Senate Majority Leader iti Senate Committee on Finance ti naitantan a panaggatang ti barko para iti Philippine Coast Guard (PCG).
Saan a naliklikan ni Zubiri nga ipeksa ti pannakadismayana kalpasan a naduktalan nga insubli iti National Treasury ti P2.5 billion nga inlatangna iti Congress of the Philippines tapno mairaman iti 2024 national budget para iti panangala ti baro a barko ti Philippine Coast Guard.
Inbatadna nga idi 2025 ket naisyuanen ti Authority to Purchase Motor Vehicle ken Special Allotment Release Order (SARO) ti proyekto kalpasan kadagiti komunikasion iti Office of the President of the Philippines.
Kunana a naaddaan pay ti naudi a pre-bid conference idi Disiembre iti napalabas a tawen.
Nupay kasta, iti kamaudiananna, naammoan nga awanen ti pundo.
Gapu iti daytoy, kwinestionaran ti senador no resulta dayoy ti palpak iti bureaucracy wenno posible nga anomalya.
Kuna pay ni Zubiri, dakkel a pukaw daytoy gapu ta win-win situation ti nasao a proyekto.
Kabayatanna, malaksid a manayonan dagiti barko a pangpatrolya iti West Philippine Sea a masansan a serserreken ti China, mapatta-apatta a tallo a ribu a Pilipino ti maipaayan koma ti trabaho gapu ta plano nga aramiden ti barko iti maysa a shipbuilding facility idiay Balamban, Cebu.
