LAOAG CITY – Natukkol ti akin-kanawan a saka ti nakabisikleta a lakay kalpasan a nadungpar iti motorsiklo iti Brgy. Rioeng ditoy ciudad.
Nabigbig ti biktima a ni Hipolito Nicolas, 66, naasawan ken residente ti nasao a barangay idinto a ti nakadungpar kenkuana a motorsiklo ket inturong ni Luisito Pascual, 60, naasawan ken residente iti Brgy. 14 iti ili a San Nicolas.
Segun kenni Pol. Staff Sergent Glenn Asuncion ti Investigator ti PNP Traffic Division ditroy ciudad, agpadpadaya a direksyon ni Pascual iti National Highway a bisinidad ti nadakamat a barangay idinto nga agpaabagatan a direksyon ni Nicolas manipod iti amianan a direksyon ket dita a nagdinnungpar da.
Insigida a naitaray dagiti dua iti Gov. Roque Ablan Sr. Memorial Hospital para iti naan-anay a pannakataming da.
Naiyakar iti pribado nga ospital iti ili a San Nicolas ni Pascual ken addaan iti natalged a kasasaad dagiti dua.
