LAOAG CITY – Inpasigurado ni Mrs. Vilma Eda, Schools Division Superintendent ditoy ciudad ti Laoag a nakasagana aminen a pagadalan ken uray dagiti mangisursuro iti panangrugi ti klase partikular ti in-person classes a mangrugi intono Lunes, Agosto 22.
Inbatad na a saan pay laeng a mandatory ti panagturong amin dagiti ubbing iti pagadalan intono Lunes.
Segun ken ni Eda, ti mandatory in-person classes ket mangrugi paylaeng intono nobyembre 2 ita a tawen.
Kuna na nga agdepende ti management ti eskwela a mangdeterminar no kasanu ti kaado ti sumrek nga estudyante iti pagadalan.
Iti agdama, inpakaammo ni Eda nga umaboten iti 25, 024 nga estudyante ti nakaenrol ditoy ciudad ti Laoag.
Mainaig iti daytoy, inbatad ni Eda a saan a mandatory ti panagpabakuna dagiti ubbing kontra iti covid-19 ngem gutgutiguten na dagiti nagannak a nasaysayaat no pabakunaan da dagiti annak da.
Nupay kasta, inpetteng na a ti saan a panagbakuna ti maysa nga ubing kontra iti covid-19 ket saan nga isu ti rason a saan a makastrek iti pagadalan ken mabully babaen kadagiti pada na nga ubbing.
