LAOAG CITY – Nakairecord iti nangato a bilang ti teenage pregnancy ti Gender and Development office ditoy probinsiya idi napan a tawen 2023.
Segun kenni Ms. Janet London mangidadaulo iti nasao a pag-opisinaan.
Kunana nga idi tawen 2023 ket umabot ti 543 ti bilang dagiti ubbing a nagsikog ken nasapa a nagbalin nga ina.
Inpakaamo na a 299 kadagitoy ket manipod iti umuna a distrito idinto a dagiti 244 ket manipod iti second district.
Kunana a datoy a datos ket nangatngato a bilang nu idasig iti napalabas nga uppat a tawen.
Naammuan a ti kaubingan ditoy ket agtawen laeng ti 12.
Mainaig iti daytoy, inrakurakna a basar iti panakisarsarita da kadagiti biktima ti teenage pregnancy ket naamuan a kaaduwan kadakuada ket gapu iti impluwensiya iti barkada rason no apay a simrek da iti daytoy ket temptasyon.
Gapu iti daytoy ket inpanamnama ni London nga agtultuloy iti panangiwayat da iti symposium kadagiti pagadalan tapno masursurwan dagiti ubbing iti panangprotekta da iti kabukodan da a bagi, kangrunaan dagiti sakit a maala, family planning ken dadduma pay.
Kabayatanna, inpetteng na nga awan pay ti datos da iti enero 2024 ngem patien na nga ada dagiti baro manen a bilang dagiti teen moms iti daytoy a tawen ditoy probinsiya.
Maipalagip nga immunan nga inbatad ti Commission on Population and Development (PopCom) iti panakaalarma da gapo iti paubing a paubing a tawen dagiti nasapa nga agbalbalin nga ina nu sadinno nga agtawen ti 10 ti nairecord da a kaubinga iti intero a pagilian.
