LAOAG CITY – Inyestorya ni Mr. Cris Arcilla ti panagbalin na a maysa kadagiti biktima iti nakalaylay a waya a nangitunda ti desgrasya iti paset ti Brgy. Pias Sur iti ili ti Currimao.
Segun ken ni Arcilla, bayat ti panagdaldalyasat na iti kalsada kadua na iti asawa na a kinallubon na iti motorsiklo ket adda ti sinaruno da a truck.
Kuna na a gapu iti sinaruno da a truck ket saanna a nakita nga adda ti nakalaylay a waya iti kalsada rason a nagderderetso iti panagmaneho agingga a nadalapos ken naisab-it ti motorsiklo iti waya.
Inbatad na a gapu iti daytoy ket napukaw ti balanse iti motorsiklo rason a nabattog da iti asawa na ken daytoy ti nangitunda ti panagsagaba da ti sumagmamano a sugat iti nagduduma a paset ti bagi da.
Kabayatanna, inpakaammo ni Arcilla nga adda dagiti nagresponde a pulis ngem awan ti naripar na a nangurnos iti nakalaylay a waya.
Innayun na a sumagmamano pay a minutos kalpasan ti pannakadesgrasyada ket adda ti simmaruno a nadesgrasya gapu met laeng iti nakalaylay a waya.
Mainaig iti daytoy, inbaga ni Arcilla nga awan ti sabali a kiddaw na ngem ketdi ti tulong para iti panagpaagas da iti asawana a manamnama a dumalan iti x-ray.
Rumrumuar a kukua ti maysa a telecommunication company ti nakalaylay a waya iti nakapasamakan ti insidente.
