LAOAG CITY – Naisab-it ti nakalaylay a waya ti kuryente iti maysa a cargo van iti kawatiwatan ti Airport Road iti Barangay Nangalisan ditoy ciudad ti Laoag.
Gapu iti daytoy, bimmaba dagiti dadduma pay a waya a nangitunda ti pannakatukkol ti maysa a poste iti met laeng nasao a lugar.
Nangitunda met ti nakaro a trapiko ti pannakaisab-it ti waya iti cargo van a nagresulta ti pannakatukkol ti maysa a poste.
Dagus met a nagresponde dagiti kameng ti Ilocos Norte Electric Cooperative (INEC) iti nasao a lugar.
Agtultuloy ti imbestigasyon dagiti otoridad ken amwen da no adda ti sungsungbatan ti INEC gapu kadagiti nakalaylay a waya ti kuryente.
