LAOAG CITY – Maysa a tortoise nga agnagan ti Solomon ti naglibas iti pagtaenganna ken nangitunda ti pannaka-delay ti uppat a tren idiay Surrey, Southeast England.
Idi Hulio 21, nakita ti maysa kadagiti train driver ti South Western Railway ti maysa a tortoise a nakaabbeng iti pagdalyasatan ti riles, agarup ala sais ti rabii.
Tapno maiyadayo daytoy iti risgo, naipasardeng manipud kadagiti sumagmamano a biahe dagiti tren. Inlugan ti train driver ti tortoise iti inturongna a tren ken inkabilna iti kaasitgan a train station, ti Ascot Station.
Naammoan a ti tortoise nga agnagan ti Solomon ket naglibas manipud iti maysa a pagtaengan nga asideg iti Ascot Station.
Mainaig iti daytoy, apaman a nakita nga awan ti injury ni Solomon, dagus met a naisubli ti tortoise iti akinkukua daytoy.
Dimmawat ti panagpadispensar ti South Western Railway kadagiti naapektaran a pasahero iti uppat a na-delay a tren.
