LAOAG CITY – Natay ti maysa a nakamotorsiklo a lalaki kalpasan a nakadinnungparna ti maysa a kotse iti Brgy. 38-A Mangato ditoy ciudad ti Laoag.
Nabigbig daytoy a ni Edgar Ventura y Coloma, agtawen ti 41, construction worker, residente iti nasao a a barangay idinto a ti nakadinnungparna ket ni Brgy. Kagawad Bobby Pascual y Bungcayao a residente iti Brgy. Calayab ditoy ciudad.
Basar iti imbestigasyon ti PNP Laoag, naggapo iti laud a direksyon ti biktima ken rumuar daytoy iti highway idi kellaat a nagsinnabat da kenni Pascual a naggapo met iti amianan a direksyon ket dita a nagdinnungpar dagiti dua a nangitunda iti pannakaipurwak ti biktima iti 5 a metro manipod iti nakapasamakan ti panagdinnungpar.
Gapu iti daytoy, naideklara a dead on arrival ni Ventura gapu iti sinagabana a nakana a head injury.
Iti agdama, nakabalod ni Pascual iti PNP Laoag ken naduktalan nga adda iti impluwensya ti nasanger idi napasamak ti panagdinnungpar.
Naamoan nga agpada a napaspas iti taray dagiti dua a lugan.
