LAOAG CITY – Nagdinnungpar dagiti tallo a lugan iti national highway iti Brgy. 32 Corocor iti ili ti Bacarra.
Nabigbig ti driver ti motorsiklo nga Euro 125 nga agmaris ti nangisit a ni Gilbert Bernado Gonzales, agtawen ti 48, naasawaan, construction worker, awanan ti lisensia ken kaduana ti kinalubbonna a ni Erwin Gonzales Garduque, agtawen ti 23, awanan asawa, construction worker nga agpada a residente ti Brgy. 15 iti ili ti Bacarra.
Nabigbig met ti nangiturong ti tricycle a ni Ronel Magaoay Viernes, agtawen ti 54, residente ti Brgy. Cabusligan iti nasao nga ili ken kaduana a nakalugan ti asawana a ni Joe Ann Bautista Viernes, agtawen ti 45 pakairamanan dagiti annakna nga isuda Jyanne Rorielle Bautista Viernes, agtawen ti 18 ken Joerielle Rhyanna, agtawen ti 14 nga agpada pay laeng nga agad-adal.
Bayat a nabigbig met ti driver ti kurong-kurong a ni Mark Anthony Daquioag Santos, agtawen ti 40, naasawaan, construction worker ken residente ti Brgy. 18 San Quirino ditoy siudad ti Laoag.
Basar iti imbestigasion ti Philippine National Police iti ili ti Bacarra, bayat a dumaldalyasat ti nakamotorsiklo nga agturong nga agpa-amianan idinto a ti tricycle ken kurong-kurong ket agturong met nga agpa-abagatan.
Segun kadagiti otoridad, maipagarup a ginandat ti nakamotorsiklo nga ag-overtake iti maysa a Public Utility Jeepney ngem ditoy metten a nakadinnungparna ti tricycle agingga a naidungpar met daytoy iti nakakurong-kurong.
Mainaig iti daytoy, dagus a naitaray dagiti maseknan a biktima iti Governor Roque Ablan Senior Memorial Hospital ditoy siudad ti Laoag babaen ti nagresponde a paramedics ti Municipal Health Office ken Bureau of Fire Protection iti ili ti Bacarra para iti naan-anay a pannakatamingda.
Naammoan a dagiti nairaman a lugan iti napasamak a desgrasia ket nakapasar ti nakaro a pannakaperdina.
Kabayatanna, nabartek ti nangiturong ti motorsiko idi mapasamak ti nasao a desgrasia.
