LAOAG CITY – Nagdinnungpar ti maysa a motorsiklo ken bisikleta iti Barangay 48-A Cabungaan ditoy siudad ti Laoag.
Basar iti Laoag City Police Station – Traffic Division, nabigbig ti nangiturong ti motorsiklo nga Honda XRM 125 a ni Jonymar Apostadero Balmores, agtawen ti 30 ken residente ti Barangay 6, Tonoton iti ili ti Piddig idinto a nabigbig met ti nangiturong ti bisikleta a ni Noli Duyao Barangay, agtawen ti 44 ken residente ti Barangay 47 Bengcag ditoy siudad ti Laoag.
Iti naiwayat nga imbestigasion, kabayatan a dumaldalyasat ti nakamotorsiklo ken nakabisikleta nga agturong nga agpa-daya ket kellaat a bimmallasiw ti nakabisikleta iti kalsada a nangitunda ti panagdinnungparda.
Gapu iti daytoy, nagsagaba ti sugat iti nagduduma a paset ti bagi ti nakabisikleta a naitaray iti Governor Roque Ablan Sr. Memorial Hospital para iti naan-anay a pannakatamingna idinto a nagkedked ti nakamotorsiklo a maikabil iti ospital.
